Tað er ein treyt fyri at fáa danskan ríkisborgararætt, at tú ikki hevur skuld til tað almenna, sum er fallin til gjaldingar.
Kravið um ikki at hava skuld sæst í § 22 í rundskrivinum um ríkisborgararætt við lóg, sum nevnir ymisk sløg av skuld sambært danskari lóggávu. Hetta er eisini galdandi fyri umsøkjarar, sum búgva í Føroyum ella Grønlandi. Í viðgerðini av tínum máli verða upplýsingar um tína skuld fingnar til vega.
Um upplýsingarnar í skattaváttanini vísa, at tú hevur skuld, sum er fallin til gjaldingar til føroyskar ella grønlandskar myndugleikar, metir Útlendinga- og Integratiónsmálaráðið, um nevnda skuldin kann samanberast við ta skuld, sum sambært § 22 í rundskrivinum er ein forðing fyri at fáa ríkisborgararætt.
Um mett verður, at skuldin til føroyskar ella grønlandskar myndugleikar kann samanberast við ta skuld, sum er nevnd í § 22 í rundskrivinum, verður málið lagt fyri Ríkisborgararættarnevndina í Fólkatinginum. Nevndin tekur støðu til, um skuldin eftir hennara meting kann samanberast við skuld, sum er á listanum í rundskrivinum, og sum tí kann verða til hindurs fyri upptøku í lógaruppskoti um fráboðan um ríkisborgararætt.
Gev ans, at skuld, har annaðhvørt gjaldskái er givin, ella ein avdráttaravtala er gjørd (uttan bústaðarinnskotslán og/ella íbúðarinnskotslán), kann verða til hindurs fyri at fáa ríkisborgararætt.
Í sambandi við lestrarlán (SU-lán) skal viðmerkjast, at skuldin skal vera forfallin fyri at vera til hindurs, og at skuldin verður afturgoldin í avdráttum. Skuldin forfellur sostatt ikki, fyrr enn ein avdráttur ikki er goldin innan freistina (seinasta rættstundis gjaldsdag).
