Treytir

Fyri at fáa danskan ríkisborgararætt skalt tú lúka ávísar treytir, t.d. viðvíkjandi fíggjarligum sjálvbjargni, uppihaldi í Danmark, førleika í donskum og kunnleika um Danmark.

Tað er týdningarmikið, at tú tryggjar tær, at treytirnar eru lúkaðar, tá ið tú sendir umsóknina. Útlendinga- og Integratiónsmálaráðið letur ikki umsóknir hvíla við tí endamáli, at ein umsøkjari lýkur treytirnar í rundskrivinum, eftir at umsóknin er latin inn. Eru krøv, sum tú heldur, at tú ikki eigur at halda, skalt tú minnast til at upplýsa tað í umsóknini. Tú skalt eisini leggja møgulig viðkomandi skjalprógv við.

Í summum førum ber til at fáa undantak frá einari treyt ella fleiri treytum um ríkisborgararætt við lóg. Tað er bara Ríkisborgararættarnevndin í Fólkatinginum, ið kann veita undantak frá treytunum í rundskrivinum um ríkisborgararætt við lóg. Uttanríkis- og Integratiónsmálaráðið hevur sostatt ikki heimild til at veita slíkt undantak. Undantak treytar tí, at títt mál verður lagt fyri nevndina.

Tað skal viðmerkjast, at undantak frá treytunum í rundskrivinum í hvussu so er krevur, at meirilutin í nevndini er sinnaður at veita undantak. Tað verður avgjørt út frá eini ítøkiligari og einstakari meting av hvørjum umsøkjara.

Títt mál kann verða lagt fyri Ríkisborgararættarnevndina í Fólkatinginum í hesum førum:

Framløga sambært rundskrivið

Í rundskrivinum um ríkisborgararætt við lóg stendur, at títt mál verður lagt fyri Ríkisborgararættarnevndina í Fólkatinginum í ávísum førum. Tú kanst lesa meira um møguleikan fyri at fáa títt mál lagt fyri Ríkisborgararættarnevndina sambært rundskrivið í frágreiðingini um tær einstøku treytirnar.

Framløga sambært fastari mannagongd

Sambært fastari mannagongd leggur Útlendinga- og Integratiónsmálaráðið harumframt ávís mál fyri Ríkisborgararættarnevndina, so at nevndin kann taka støðu til, um undantak kann veitast frá eini ella fleiri treytum, hóast hetta ikki beinleiðis stendur í rundskrivinum. Ráðið leggur m.a. títt mál fyri nevndina, um:

• tú av órøttum hevur fingið danskt pass ella hevur verið skrásettur sum danskur ríkisborgari í CPR-skránni og tí við rímiligari grund hevur hildið teg vera danskan ríkisborgara. Tað er ein treyt, at tú lýkur treytirnar í rundskrivinum um ikki at hava framt ávís sløg av lógarbroti. Undantak kann gerast frá øllum øðrum treytum.

Tú kanst lesa meira um møguleikan fyri at fáa títt mál lagt fyri Ríkisborgaranevndina eftir fastari mannagongd í frágreiðingini um tær einstøku treytirnar og einstøku málini.

Framløga eftir umbøn frá Ríkisborgararættarnevndini í Fólkatinginum

Ríkisborgararættarnevndin í Fólkatinginum kann biðja um at fáa eitt mál lagt fram við atliti at møguligum undantaki.

Undantak er í øllum førum treytað av, at meirilutin í nevndini er sinnaður at veita undantak. Tað verður avgjørt út frá eini ítøkiligari og einstakari meting av hvørjum umsøkjara.

Um tú vilt hava títt mál lagt fyri Ríkisborgararættarnevndina í Fólkatinginum, skalt tú sjálvur seta teg í samband við ein ella fleiri limir í nevndini og biðja um undantak. Tað eru eingi krøv um, hvussu ein slík umbøn skal síggja út. Gjørt verður vart við, at tú ikki hevur krav upp á at fáa títt mál fyri nevndina. Tað stendur til tann einstaka nevndarlimin at taka støðu til, um hann ella hon vil biðja um, at málið verður lagt fyri nevndina.